POEEM

 بھید بتا 

نیلی زمیں اے نیلی زمیں

کیوں ہریالے کھیت کھنڈر ہو جاتے ہیں؟

دل بنجر ہو جاتے ہیں

( بنا بتائے )

اک سیدھا سادہ چرواہا 

چھوٹی بڑی گاڑی کے سامنے کیوں کچا پڑ جاتا ہے 

عورت اپنے مرد سے چھپ کر کیوں روتی ہے ؟

مرد پرائی عورت  پیچھے کیوں مرتا ہے ؟

آنکھوں کا کفارہ دل ہی کیوں بھرتا ہے ؟؟

نیلی زمیں زہریلی زمیں !

کیوں آ جاتے ہیں مسند پر بھدے گندے لوگ 

ثروت اور جمال کو نکّڑ والی قبر ہی کیوں ملتی ہے ؟

نیلی زمیں ! چمکیلی زمیں

اتنی پڑھی لکھی لڑکی کے ہاتھ نہیں پیلے ہو پاتے

تہمت کے بازار میں کالک کیوں سستی ہے ؟ 

اور خدا کا بھیجا ہوا انسان کہاں پر مل سکتا ہے ؟

نیلی زمیں ! 

تُو کیوں سہتی ہے ؟

کچھ گھٹیا دو پایوں کی سینے پر مستی 

کیوں نہیں ہنستی ؟؟

ہنس دے اور اب کھل کر ہنس !

اتنی دیر تو کھل کر ہنس دے 

 اونچ نیچ کا فرق مٹا دے 

چرواہے سے لے کر شاہ کے درباروں درباریوں تک وہ قہقہہ جائے !

سب مٹ جائے